ភ្នំពេញ៖ អគ្គនាយដ្ឋានគយនិងរដ្ឋាករ ទុកពេល ២០ថ្ងៃឱ្យម្ចាស់ឡានចង្កូតស្ដាំទាំងអស់ចូលទៅចុះបញ្ជីបង់ពន្ធនៅតាមអង្គភាពគយមុននឹងមានវិធានការចាប់បង្ក្រាបរឹបអូសទុក។
ក្នុងសេចក្ដីជូនដំណឹងចុះថ្ងៃចន្ទ ទី១១ ខែកក្កដា អគ្គនាយកដ្ឋានគយឱ្យដឹងថា ចាប់ពីថ្ងៃទី១ ខែសីហា តទៅ រាល់រថយន្តចង្កូតស្ដាំដែលមិនបានទៅចុះបញ្ជីទាំងអស់នឹងត្រូវចាត់ទុកជាឡានដែលនាំចូលថ្មី និងជាមុខសញ្ញាដែលត្រូវបង្ក្រាប ខណៈរថយន្តដែលបានចុះបញ្ជីរួចមានពេល៩០ថ្ងៃសម្រាប់ចូលទៅបង់ពន្ធអាករ។
សម្រាប់ម្ចាស់រថយន្តចង្កូតឆ្វេងគ្មានពន្ធដែលមានស្រាប់ក្នុងប្រទេស ក៏អាចមកបង់ពន្ធនិងអាករចាប់ពីពេលនេះតទៅរហូតដល់ថ្ងៃទី៨ ខែតុលា ឆ្នាំ២០២២ ដោយមិនរងពិន័យ។
គយបានបញ្ជាក់បន្ថែមថា៖ «ការអនុវត្តគោលការណ៍អនុគ្រោះខាងលើនេះ មិនអនុវត្តចំពោះរថយន្តដែលមានឆ្នាំម៉ូដែលចាប់ពីឆ្នាំ២០២១ ឡើងឡើយ ដែលជាកម្មវត្ថុនៃការបង់ពន្ធអាករ និងទទួលរងពិន័យ តាមបទប្បញ្ញត្តិជាធរមាន»។
ថ្លែងក្នុងពិធីសំណេះសំណាលជាមួយមួយប្រតិភូកីឡាអាស៊ានប៉ារ៉ាហ្គេមនៅព្រឹកថ្ងៃពុធ ទី០៦ ខែកក្កដា នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានសម្រេចអនុញ្ញាតឱ្យឡានចង្កូតស្ដាំទាំងអស់ឱ្យចូលទៅបង់ពន្ធដោយពុំចាំបាច់កែចង្កូតនោះទេដោយថាដើម្បីសម្រួលការលំបាករបស់ម្ចាស់រថយន្ត។ សម្ដេចតេជោ បញ្ជាក់ថាការអនុញ្ញាតនេះគឺសម្រាប់តែរថយន្តដែលមាននៅក្នុងព្រះរាជាណាចក្រកម្ពុជាហើយតែប៉ុណ្ណោះ ខណៈរថយន្តដែលនាំចូលក្រោយថ្ងៃទី៦ ខែកក្កដា នឹងមិនអនុញ្ញាតឱ្យបង់ពន្ធទេ និងមានវិធានការច្បាប់ផងដែរ។
បើតាមរបាយការណ៍របស់អគ្គនាយកដ្ឋានគយនឹងរដ្ឋាករកម្ពុជាឱ្យដឹងថាក្នុងយុទ្ធនាការ១០ខែក្នុងការអនុវត្តការប្រមូលពន្ធលើយានយន្តគ្មានពន្ធនិងអាករមានរថយន្តអត់ពន្ធ និងចង្កូតស្ដាំចំនួន ៩ ៧៥៣គ្រឿងចូលមកបង់ពន្ធ និងកក់ប្រាក់កែចង្កូតដែលក្នុងនោះមានរថយន្តចង្កូតឆ្វេងមកបង់ពន្ធចំនួន ២ ៧១៣គ្រឿងដែលប្រមូលពន្ធបានជិត ៣៥លានដុល្លារអាមេរិក និងរថយន្តចង្កូតស្ដាំមកកក់ប្រាក់យកទៅកែចង្កូតមានជាង ៧ ០៤០គ្រឿងដែលប្រមូលលុយកក់បានជាង ៤១លានដុល្លារអាមេរិក៕
